Khawaarijta Xisbul-Shaydaan oo beero Xoog kula wareegay.

07 03 2010
Khawaarijta ka tirsan Kooxda Xisbul-Shaydaan ayaa Shalay si xoog ah ula wareegay Beero ay lahaayeen Dad shacab ah oo ku yaalla Wadada isku xirta Degmooyinka Afgooye iyo Balcad ee Goballada Shabeelada Hoose iyo Shabeellada Dhexe.
 
Wararka aan ka helayno deegaannada ku hareereysan wadada Isku xirta Degmooyinka Afgooye iyo Balacad ayaa sheegaya in ay Khawaarijta ka tirsan Kooxda Xisbul-Shaydaan ay Shalay si xoog ah ula wareegeen Beer uu lahaa Nin Magaciisa lagu soo gaabiyay Baasi iyo Beero kale oo ku yaalla Wadadaasi.
 
Warku wuxuu intaasi ku darayaa in Khawaarijtaan Jidgooyooyin hor leh dhigteen Afaafka hore ee laga galo Beeraha ay leeyihiin Dadka Masaakiinta ah ee ku sugan wadada Isku xirta Degmooyinka Afgooye iyo Balcad ee Goballada Shabeelada Hoose iyo Shabeelada Dhexe iyagoo gebi ahaanba la wareegay Qaar ka mid ah Beerihii ku yaallay Waddadaasi, kuwaas oo ay ku doonayaan in ay ka dhigtaan Fariisimooyin Maleeshiyo.
 
Sidoo kale waxaa jira 2-Gaari oo ay saaran yihiin Qudaarta kuwaas oo ku xayiran Mid kamid ah Beerihii ay sida qasabka ah kula wareegeen Khawaarijta Xisbul-Shaydaan islamarkaasna laga yaabo in ay halowdo maadaama ay Khawaarijtaan diideen in Qof uu u gudbo Beerahaasi Dhexdooda.
 
Arrintaan ay ku dhaqaaqeen Khawaarijta Kooxda Xisbul-Shaydaan ayaa qeyb ka ah Dhibaatooyinka iyo Falalka Boobka ah ee ay Maleeshiyaadka Kooxdaasi ku hayaan Bulshada Soomaaliyeed, gaar ahaan Kuwa ku mashquulsan Wax soo saarka Dhinaca Beeraha, iyadoona taasi ay dareen xooggan gelisay Beeraleydii Soomaaliyeed ee Beerahooda Xoog loogala Wareegay.